Clint Eastwood da Bilbao Mendi Film Festival Jaialdiaren
zazpigarren edizioko irudiaren protagonista. Aktore eta zuzendari estatubatuar entzutetsua Suitzako
Alpeetako Eiger mendiaren (3.970 m) ipar aurpegian ageri den argazki historiko
bat izango da jaialdiaren kartel iragarlea
The Eiger Sanction filmeko eszena gorenekoa da irudia;
Eastwoodek zuzendutako lehen pelikuletako bat da aipatutakoa, eta filmatu zela
40 urte betetzen diren honetan, omenaldia egingo zaio euskal jaialdian,
emanaldi berezi baten bidez
Abenduaren 12tik 21era izango da Mendi Film, Bizkaiko
hiriburuan.
Hamish Macinnes eskalatzaile zailduarena da argazkia. Berak ahal kontatzen du: “Eigerreko ipar
aurpegian ginen. Clint Eastwood harkaitz irtengune batean zegoen soka batetik
zintzilik. Eskailera baten ertzari lotuta zegoen soka eta eskailera, berriz,
tranpolin baten moduan zegoen jarrita. Sei bat metro ateratzen zen erlaitzaren
ertzetik. Egun batzuk lehenago, eskalada taldeko kide bat, Dave Knowles, hil
egin zen handik gertu, harri-jausi baten ondorioz. Geratu egin zuten filmazioa.
Ni, aldiz, gas-gangrena baten ondoriozko ebakuntza batetik osatzen ari nintzen
garai hartan. Kleine Scheideggek deitu zidan Eigerreko ipar aurpegiaren
magaletik, ea hurrengo hegaldia hartu eta berehala joan nintekeen hara, arazoa
konpontzera. Abiatu aurretik, aluminio-aleazioko trepeta bat egin nuen zauria
babesteko. Eta halaxe sartu nintzen
bete-betean “The Eiger sanction” filman… Clintek ez zuen inolako emoziorik agertu
bere lekura jaisten genuen bitartean. Bazuen nahikoa lan bere burua zuzentzen.
Ziur nago, soka moztu behar zen eszena arriskutsu horrek iraun zuen denboran,
denok poztu zirela sokaren beste muturrean ez egoteaz. Clinten kezka nagusia
zen eskuineko eskuan zuen labana suitzarrak soka ebakiko ote zuen ala ez. Plana
hauxe zen: gure kamera eta eskalatzailea eskaileratik igo behar zuen goi-goiko
mailaraino, Clinten soka zegoen lekuraino, eta handik, lehen eta bigarren
mailen arteko zulora zuzendu behar zuen kamera astuna, gure zuzendari/ordezkoaren
ikuspegi panoramikoa lortzeko. Beste eskailera laburrago bat genuen posizio
bertikalean jarria, Clinten “tranpolinaren” erdian. Eskaladako bi soka lotu
genituen Clinten tranpolinaren mutur batetik eskailera bertikalaren goiko
aldera, eta hortik erlaitzean instalatutako ainguraleku sendo-sendoetara.
Clintek soka ebaki eta amildu zenean, Mike Hoover gorantz atera zen
katapultatuta. Labanak ihes egin zion eskutik, planeatutakoari jarraituz. Pitoiak eta zabaltzeko lokailuak sartu
genituen erlaitzaren azpialdean, erorikoari eusteko. Clint balantzaka geratu
zen batera eta bestera, ainguraleku haietatik zintzilik. Biharamunean,
sekuentzia horren amaiera filmatzen jarraitu genuen behetik. Sekuentzia
horretan, soka ebakitzen du Clintek eta George Kennyk tira egiten dio izotzezko
tuneleraino. Eigerreko ipar horma eta aurpegi horren barnean
Weissfluhjocheraino igotzen den funikularra lotzen ditu pasabide horrek.
Eskalatzaile itxurako zenbat maniki ere jaurti behar izan genituen irtengune
hartatik, filmean hildako pertsonaia batzuen itxurak egiteko. Filmazio lana
mendi errusiar baten modukoa izan zen, eta mendiaren eta filmazioko
lantaldearen arteko erronka ez zen amaitu gure motxilak jaso arte. Sentipena
izan nuen, denbora gehiago geratu izanez gero, Eigerrek irabaziko zuela erronka
hura”.
