Himalaian hiru kolore

2007/03/26

G-II KATALANEZ

“Cami sense cim” izan da Jaume Gibernau lagunak botako duen diaporamarako aukeratu duen titulua, joan den urteko bidaia desastrosoari irteera emateko. Oinarrian, hiru lagun mendiaren aurrean. Hiruron sentimenduak eta dezepzioak, hiruron saiatzeen estrategiak, zergatiak, asmoak,… eta laguntasuna, negarrak eta besarkadak.

Jaumek soilik dakien bezala kontatuta, gozatzeko ikusgarria. Hori bai, “sense cim” eta hori ez da erraz irensten. Ni, oraindik eztulka nabil.

2007/03/06

HEMISPHERE

Mendiak, han hori,
hostoak haizearen bakalupean,
zeru borobilak, argiaren flexioak,
hodeien espedizioak,
arrats-beherako tonu plagiagaitza,
hegan doazen lumez beteriko bihotz txikiak,
ezereza gehi oroimena,
bakardadea avec distortsioa,
harriak, hortzak, hitza baino zaharragoak,
itsasoaren ezberdintasuna, bere hiltze isila,
bizitzaren ekarpenak, suaren mugak.

(Argia sortzen den izartegia, Alberdania, 1996)

*************************************
Les muntanyes, aquesta vall,
les fulles en la carícia del vent,
els cels rodons, les flexions de la llum,
les expedicions dels núvols,
el to sense plagi possible de l’ocàs,
els diminuts cors voladors replets de plomes,
el no-res més la memòria,
la soledat avec la distorsió,
les pedres, les dents, més velles que la paraula,
allò diferent de la mar, el seu silenciós morir,
les escapades de la vida,
les fronteres del foc.

(El firmament d'on prové la llum, Alberdania, 1996)

2007/02/27

HEGOALDERANTZ

Jainko guztien katigarioa ote da asteburuko eguraldi kaskar eta petral hau? Astean zehar eguzkitsu egoten da harik eta barikuak bere argiak zabaltzen dituen arte. Geu ezin geldirik egon eta hegoalderantz egin genuen, hemen, iparraldean zeru goibelago eta giro hezeago zegoelakoan.

Patones eta Cabrera bisitatu behar genituela tematu ginen. Eta harantz.

Harri polita Patones-en. Bide are politagoak. Bederatzi bide egin genituen 6a-tik 6b+eraino. Guztiak kateaturik, pege batekin, baina gustura.
Hurrengo egunean euri truxuak. Vellon-era abiatu. Euria eten gabean, eta etxera bueltan.

2007/02/22

IZARREN HAUTSA

“Izarren hautsa egun batean bilakatu zen bizigai, hauts hartatikan uste gabean noizpait ginaden gu ernai…”

Hala dio kantu famatuak. Geu Liendoko Izarren hautsa (Polvo de estrellas) bidera jo genuen larunbatean. 6c. Beste bide bat egin genuen berotzeko eta euriak harrapatu baino lehen hantxe geunden gure giharrak eta zainak tinkatuz.
Ezinean, ezin kateatu. “Pege” pare bat eta amaieraraino heldu ginen, baina pozik ez.

Egun aldrebestua. Atxarten egiten zuen haize bortitzaren ufadek hona ekarri gintuzten eta horman sarturik nengoela euritan hasi zen. Tanta lodiek rokodromora sarrarazi gintuzten. Han matxake doblea.
Balioko ahal digu!

2007/01/30

ALOÑA MENDIZERRA ELURREZ LEPO II

Panorama ederra izan zen hasi eta buka.

Akaitz mendiaren puntan, lehen bajadatxoari ekin aurretik.
Haizearen buhada gogorrak zaildu zuen ibilaldia, girotu ere bai.

Zuhaitz guztiak perlaz josirik.

Javi, azken birak ematen.
Egun polita. Elurra eta hotza Aizkorrin.

ALOÑA MENDIZERRA ELURREZ LEPO

Aste beteko elurtea izan dugu Euskal Herrian. Itsasoak ere maluta zuriak irentsi ditu. Hotzak paraje guztiak hartu ditu bere errezelean. Gure inguruko mendietan elur paketa metatu da, eta naturak eskainitako abagune ezin ederrago hau probestu dugu mendi baxutxoagoak eskiekin egiteko.

Urtarrilaren 27an Aizkorriko Aloña mendizerrarantz joan ginen mendi zenbait zeharkatzeko asmoz.

Lau orduko ibilbidean Arriurdin, Urrabiatza, Akaitz eta Boteraitz menditxoak egin genituen.

Paraje batzuek Alaskako bazterrak gomutarazten zizkiguten.

Hotza eta haizea izan genituen lagun.

Norvegiako lautadetako parajeak ote?

2007/01/26

GURE MENDIAK

Eskaladore ohia da Jesus Mari Lazkano. Atxarten ezagutu nuen aspaldian, hango harriak eskaladore guztiak batzen zituenean. Bere lanak ikaragarriak dira.
Mendiak, gure ingurukoak ere, ederki lotzen dira oihal gainean berak margotzen dituenean.

Une honetan ikusten ari garelako sentsazioa da zabaltzen zaiguna.

2007/01/17

FISCHESSER ESPOLOIA II

Alfonsoren begietatik ikusitakoa argazkietan.

Egun berriak luzatzen zigun paisaiaz gozatzen, Jordi lehen urratsak ematen ari delarik.

Alde batean tenperatura gozoa, erpinean hotza.

Goitik beherako begirada batez jarraituriko bide luzea eta malkartsua.
Vivac ahaztezinean tramankulu guztiak behar bezala lotzen.

2007/01/16

FISCHESSER ESPOLOIA

Urtarrilaren 13 eta 14an. Elurra galdu da, ez daki nora joan, eta mendietan lurmenak agertzen dira nonahi. Beldurrak egongo da iparralde urrun hartan?
Izotza urriago dago ur-jausietan. Neguko antzarrek eta eskaladoreak harridura aurpegia dugu.

Campbieil (3175 m) handiaren gailurrera jotzen duen Fischesser espoloia fitxatuta geneukan aspalditik. Elur gutxi dagoen sasoi hauetan abiatu ginen bere maldetan gora gozatzera.
Larunbatean atera ginen etxetik, Piau-Engalyra heldu, trasteak prestatu, zerbait tripa barruratu eta lehen izerdiak botatzen hasi ginen Jordi, Alfonso eta hirurok motxilaren pisuaz.
Ertz luzearen lehen largoak belar-harrietan egin genituen. Harria exkaxa, babesteko lotune gutxi eta esposizio handia kasu batzuetan. Beldurrak airean, izerdia bizkarrezurrari itsatsita. Lehen parte hori gainditurik, ertzetik hasi ginen oreka ariketak egiten, ttipi-ttapa, gauaren errezela zabaldu zen arte.
Geunden tokia onena iruditu zitzaigun, hoberik ezin iluntasunean topatu. Elurra zapaldu, sokak ondo finkatu, sokei den-dena lotu, eta bertan “etzan” ginen, hala-moduz, gaua iragaiteko asmoarekin.

Ederra izan zen izarrek luzatu ziguten filma. Ederra, handik goitik harritu nahi izan gintuen arturratzea. Ederra, naturak eskaini digun abagune pribilegiatu hau.
Egunaren lehen koloreekin traste guztiak bizkarreratu eta malda elurtuen gora abitu ginen gailurreraino hiruron arteko azken besarkada ematera. Pozik, inoizkorik gozamen handienarekin barruan.

1.100 metro. Bi eguneko lana, 7 ordu. Poztasuna zabala.

HARRIA BERO DAGO ORAINDIK

2006ko azken egunak dira. Izotz gutxi zerbait behar bezala pintxatzeko. Hotz egiten duen arren eguzkiak berotzen ditu Nafarroako hormak.

Harria bero dago oraindik. Harrietan gora segituko dugu isurkin hormatua agertzen ez den bitartean.

San Faustora joan gara urteari agur esateko. Lizarrako eskola hau zoragarria da. Seigarren graduko bide ederrak daude nonahi, eskura, gure eginahalak asetzeko.

Riglosera joateko gogorik ez eta Irurtzuneko Ahizpetan lotu gara gero. Gaur hotza pasatu badugu ere bidea ederra izan da.

2006/12/18

MENDIETAKO LILURA

Hango mendietako lilura etortzen zait batzuetan gogora, eta bat-batean berriz ikusi nahi ditut, hor, ikutuzkoak balira legez.

Broad Peak (8.047 m). Betiko ametsa.

Gasherbrum mendikatean, IVa ezartzen zaigu begien aurrean Baltoro glaziarrean gora egiten dugularik. Ero batzuen amets ezina, edertasunean margozturik beti.

Paregabekoak ilunabarrak. Mendietako puntek zerua orrazten dute arratsaldero.
Hipnosis xelebrea jazoten zaiguna. Betierekotasuna soma liteke.

2006/11/09

BESTELAKO ALTURAK

Oxigenorik gabeko altura, fisikoagoak diren beste batzuekin trukatu dugu bolada batez, udazkena sasoi onenetakoa baita eskaladarako. Amildegiak eta hauek sortzen duten hustasunaren sentsazioak dira erakargarrienak. Inoiz menperatuko ez dugun ingurua bada ere, hor askatasuna ere senti daiteke. Gorako mugimenduetan, indarrezko jarreretan antzematen dugu gure barneko mugarekiko borroka. Lortuz gero poztasuna, horrela gertatzen ez bada, sustoa. Grabitateak ez baitu urrikalpenik. Urriaren 28 eta 29an Riglos eta Ansaberen izan ginen Jordi eta biok Candi eta Fernadorekin, Cho-Oyuko lagunak.

Riglos-eko Fire-k, dituen 350 metrorekin errepetu handia sortu digu beti.

Fire handiaren labirintoetan zehar. Rabada-Navarro bidea zoragarria da lagunekin.

Tontorrean, zazpi orduren buruan, egarrituta baina pozarren. Candik atera digu argazkia.

Pagaditik hurbil egin dugu lo, izarrei begira, gaueko zaratak entzuten. Eguzkiak argia ekarri du paraje harrigarri honetara. Bestelako amildegiak Ansaberen. Montaner bidea hautatu dugu puntaraino joateko.

Diedro eta zeharkaldi zoragarrietan gora goaz, eskaladak eragiten digun izerdi dezente botaz. Asteburu ederra. Gozatu dugu gutxitan ez bezala.

2006/10/10

JENDEA, LAGUNAK, MENDIAK, OROIMENAK.

Jendea, lagunak, mendiak, oroimenak... denetarik izaten da espedizio hauetan.
Zerrenda luzeak egin litezke, oroitzapen bildumak, begiraden pilaketak, sentimenduen metatze hutsak, eta hauxe guztia hemen jarri arren, askozaz ere gehiago da mendiak ematen dizuna.